13 January 2017

ఎటో

ఆకులపై మంచూ, మసక
వెన్నెల. ఊగే
నీడలు. చెట్ల కింద చెదిరి
తడిచిన మట్టి ...
ఎక్కడో బాతు అరుపులు -
"ఎన్ని ఉన్నాయో
వీళ్ళ కళ్ళల్లో! తెలుసా నీకు?"
ఆవిడ అడిగింది
పిల్లల్ని ఒడిలో ఊపుతో -
***
అప్పటికే, క్వాక్క్వాక్ మంటో
ఈ పొయెమ్తో ఎటో
వెళ్లేపోయాడు అతను!

11 January 2017

ప్రతిబింబం

గోడకి వేలాడే అద్దం. పక్కగా
బల్లపై ఒక దువ్వెన -
రంగురంగుల టిక్లీల పాకెట్
ఒక పౌడర్ డబ్బా -

కిటికీ తెరచే ఉంది. తేటగా
ఆకాశం. చిన్నగా గాలి -
ఎక్కడో పక్షి కూస్తోంది. చెట్ల
నీడల్లో రెక్కల కదలిక ...
***
అద్దంలోంచి నిన్ను చూస్తో
నవ్వుతో ఎవరో ఇక్కడ
ఒకప్పుడు ఉండే ఉండాలి! 

సంరక్షణ

రాత్రి గడచిపోయింది -

రాత్రంతా తను అలాగే, రాలిన
మొగ్గలాగే, జ్వరంతో
అతని ఛాతిపై కలవరింతలైతే
తడిచిన ఓ రుమాలైతే
***
ఉదయం అడిగారు పిల్లలు
అతనిని: "నాన్నా
అమ్మకేమయ్యింది నాన్నా?"

10 January 2017

నీ గొంతు

ఎవరో వేలికొసతో తాకినట్టు
రాత్రి. చీకటి -
ఆకులపై మెరిసే తడి. పసి
పిడికిలి వలే
గూడు. అలసిపోయి రెక్కలూ
మునిగే కళ్ళూ ...
***
అమ్మాయీ, నీ గొంతు కూడా
అంతే. నేలపై
తడిచి ఊగే నీడకు మల్లే ... 

అంగీకారం

కొంచమే గాలి. ఎంతో చీకటి -
ఒంటరి వీధీ, ఖాళీ
రాత్రి. అయినా, లోపల లీలగా
మెతుకంత నీ మాట
తెల్లగా, మొగ్గలా, ఒక పసివాడి
కలవరింతలా చిన్నగా ...
***
కొంచమే గాలి. ఎంతో చీకటి -
అయినా చాలు -
చూడు: ఎంత ఆనందమో

ఇక్కడ, నువ్వు వెలిగిన చోట! 

07 January 2017

సంస్మరణ

చాలాసేపటి వరకూ ఇద్దరూ
మాట్లాడుకోలేదు -

బయట చీకట్లో గాలి సవ్వడి
లీలగా చలి వాసన -
నిప్పు రాజేసినట్టు ఒక చిన్న
వెలుతురు: ఎక్కడో
దూరంగా. ఒకోసారి దాదాపు
చేతికి అందేటట్టుగా ...
***
చాలాసేపటి వరకూ ఇద్దరూ
మాట్లాడుకోలేదు
సమాధి ముందు నిలబెట్టిన
రెండు రాళ్ళలాగా!  

06 January 2017

రాజీ

కాంతి కనుమరుగై
దినం -

తినే కంచం, నీళ్ళూ
మంచం
కంబళీ, ఒక దిండు -
దగ్గర్లో
కూజా, నిద్రమాత్రా ...
***
"ఐ నో వి ఆర్ గెట్టింగ్
ఓల్డ్" తను
అన్నది
రెక్కలు విప్పినట్టు
దుప్పటిని
విప్పుతూ - 

05 January 2017

communication

"ఎవరు నువ్వు? అసలు
నీకేం కావాలి?"

ఖండిత చేతులనీ, మరి
నాలికనీ చూపించి
"గ్ గ్ గ్ గ్ గ్" అని శబ్దిస్తూ
ఏవేవో సంజ్ఞలు

చేసాడు అతను: మొండి
చేతులని జోడించి
తన ముందు మోకరిల్లి!

ఆమోదయోగ్యం

"ఐ ఏమ్ సిక్ ఆఫ్ యు -
లీవ్ మీ ఎలోన్"

తెచ్చిన పూలూ, బ్రెడ్డూ
మాత్రలూ ఇంకా
ఓ రహస్య హృదయాన్ని
అక్కడే ఉంచి

తిరిగి వెళ్ళిపోయాడు
అతను!